พุทฺธสฺส ภควโต ปรินิพฺพานโต ทฺวิสตาธิกานํ ทฺวินฺนํ วสฺสสหสฺสานํ อุปริ นวุติเม วสฺส สีหฬทีเป รชฺชํ ปตฺตสฺส กิตฺติสฺสิริราชสีหมหาราชสฺส อภิเสกโต ตติเย วสฺเส เตเนว กิตฺติสฺสิริราชสีหมหารญฺญา ปหิตปณฺณาการสาสนํ อาคมฺม สรามาธิปติธมฺมิกมหาราชาธิราเชนาณตฺเตหิ ลงฺกาทีปํ อาคเตหิ อุปาลิตฺเถ ราทีหิ ปติฏฺฐาปิโต วํโส อุปาลิวํโสติ ปากโฏฯ โสจ ทุวิโธ ปุพฺพารามวิหารวาสีอภยคิริวิหารวาสีวเสนาติฯ เอวํ มหานครโยนกลฺยามรฏฺเฐสุ สาสนํ ถิรํ หุตฺวา ติฏฺฐตีติ เวทิตพฺพนฺติฯ
อิติ สาสนวํเส มหารฏฺฐสาสนวํสกถามคฺโค นาม
นวโม ปริจฺเฉโทฯ
10. จินรฏฺฐสาสนวํสกถามคฺโค
[10] ตโต ปรํ ปวกฺขามิ จีนรฏฺฐสาสนวํสกถามคฺคํ ยถาฏฺฐวิตมาติกาวเสนฯ
ตติยสงฺคีตาวสาเน หิ มหาโมคฺคลิปุตฺตติสฺสตฺเถโร มชฺฌิมตฺเถรํ จินรฏฺฐํ เปเสสิ,-ตฺวํ เอตํ รฏฺฐํ คนฺตฺวา เอตฺถ สาสนํ ปติฏฺฐาเปหีติฯ
มชฺฌิมตฺเถโรจ กสฺสปโคตฺตเรน อฬกเรวตฺเถเรน ทุนฺทภิยตฺเถเรน มหาเรวตฺเถเรนจ สทฺธิํ หิมวนฺตปฺปเทเส ปญฺจจีนรฏฺฐํ คนฺตฺวา ธมฺมจกฺกปฺปวตฺตนสุตฺตนฺตกถายตํ เทสํ ปสาเทตฺวา อสีติปาณโกฏิโย มคฺคผลรตนานิ ปฏิลาเภสิฯ ปญฺจปิจ เต เถรา ปญฺจรฏฺฐานิ ปสาเทสุํฯ เอกเมกสฺส สนฺติเก สหสฺสมตฺตา ปพฺพชิํสุฯ เอวํ เต ตตฺถ สาสนํ ปติฏฺฐาเปสุํฯ
คนฺตฺวา มชฺฌิมตฺเถโร, หิมวนฺตํ ปสาทยิ;
ยกฺขเสนํ ปกาเสนฺโต, ธมฺมจกฺกปฺปวตฺตนนฺติฯ
ตตฺถ กิร มนุสฺสา เยภุยฺเยน จนฺทีปรมีสฺวารานํ ยกฺขานํ ปูชํ กโรนฺติฯ เตเนว เต ปญฺจ เถรา เตสํ ยกฺขเสนํ ปกาสยิตฺวา ธมฺมํ เทเสสุํฯ กสฺมีรคนฺธารรฏฺฐํ ปน กทาจิ กทาจิ จีนรฏฺฐินฺทสฺส วิชิตํ โหติ, กทาจิ กทาจิ ปน วิสุํ โหติฯ ตทา ปน วิสุํเยว อโหสีติ ทฏฺฐพฺพํฯ
จีรนฏฺเฐ ปน ภควโต สาสนํ ทุพฺพลํเยว หุตฺวา อฏฺฐาสิ, น ถิรํ หุตฺวาฯ เตเนว อิทานิ ตตฺถ กตฺถจิเยว สาสนํ ฉายามตฺตํว ปญฺญายติ, วาตเวเคน วิกิณฺณอพฺภํวิย ติฏฺฐตีติฯ
อิติ สาสนวํเส จีนรฏฺฐสาสนวํสกถามคฺโค นาม
ทสโม ปริจฺเฉโทฯ
เอวํ สพฺเพน สพฺพํ สาสนวํสกถามคฺโค นิฏฺฐิโตฯ
เอตฺตาวตาจ –
ลงฺกาคเตน สนฺเตน, จิตฺรญาเณน ภิกฺขุนา;
สรณงฺกรนาเมน, สทฺธมฺมฏฺฐิติกามินาฯ
ทูรโตเยว ทีปมฺหา, สุมงฺคเลน โชตินา;
วิสุทฺธสีลินาเจว, ทีปนฺตรฏฺฐภิกฺขุนาฯ
อญฺเญหิจาภิยาจิโต, ปญฺญาสามีติ นามโก;
อกาสิํ สุฏฺฐุกํ คนฺถํ, สาสนวํสปฺปทีปิกํฯ
ทฺวิสเตจ สหสฺเสจ, เตวีสาธิเก คเต;
ปุณฺณายํ มิคสีรสฺส, นิฏฺฐํ คตาว สพฺพโสฯ
โกจิ เอตฺเถว โทโส เจ, ปญฺญายติ สุจิตฺตกา;
ตํ ขมนฺตุ จ สุทฺธิยา, คณฺหนฺตุ ยุตฺติกํ หเวติฯ
